এটোপাল চকুলো

এখনি ভগ্ন হৃদয়ৰ টুকুৰা
এটোপাল চকুলো
কলিজাৰ কেচা তেজেৰে লুতুৰিপুতুৰি
এপাহ ৰঙা গোলাপ
আৰুনু কি আছে দিবলৈ মোৰ
নালাগে আৰু ভালপোৱা
নেখেলো আৰু প্ৰেমৰ তেজাল খেল
তোমাৰ চকুলোৰে ধুই পেলোৱা
চেকুৰা চেকুৰ শুকাই কলা হোৱা
শোকৰ তেজাল স্মৃতি.....

কবি নহয় মই

কবিতা লিখিবলৈ কবি নহয় মই
পৰিৰ কাহিনী লিখিবলৈ শব্দও নাই
নাই প্ৰেমৰ প্ৰথম অনুভৱ
ভগ্ন হৃদয়ৰ টুকুৰা বুকুত সাৱতি
জীয়াই আছোঁ মাথোঁ
অপেক্ষাৰত অচিন চিনাকিলৈ
অকণমান সহাৰিৰ অপেক্ষাত
হৃদয়ৰ কোণত এচিকটা মাটিলৈ
সেয়াই হব জীৱন জীয়াৰ সমল
জীয়াই থকাৰ অৰ্থপূৰ্ণ সমল
আৰুনু কি লাগিছে
জীৱন উদযাপন কৰিব'লৈ..... ❤

হৃদয়ৰ পৃষ্ঠা

পৰিসীমাত আৱদ্ধ আজি মোৰ মৈলাম
উকা হৈ ৰল হৃদয়ৰ পৃষ্ঠাসমূহ
তেজৰ চিয়াহীৰে পুৰাম কেতিয়াবা
তোমাৰ ৰঙা নীলাৰে লিখিম
ভালপোৱাৰ দস্তাবেজ
যদিহে সময়ে দিয়ে তোমাৰ স্মৃতি
আকৌ ৰুম গোলাপৰ পুলি
হোৱাহি যদি তুমি মোৰ
মন ফুলনিৰ মালিনী..... ❤🌹

পৰিসৰ

সুবিশাল অনুভৱৰ পৰিসৰক
দুখেৰে নিদিবা প্লাৱিত হবলৈ
যোগাত্মক ভাৱে লিখি যোৱা
তোমাৰ জীৱনৰ টোকাবহীত
স্মৃতিৰ শীতল ছাত বহি
যেতিয়া লুটিয়াই চাবা
হৃদয়ৰ দস্তাবেজ
জীৱনৰ বিয়লিবেলাত
বিচাৰি পাবা তাতেই
জীৱন জীয়াৰ সাৰ্থকতা.....☺

এমুঠি জোনাক

হৃদয়ৰ অনুভূতি বন্দী আজি
উৱলি যোৱা ডায়েৰীৰ এখিলা পাতত
তেজৰ চিয়াঁহী শুকাই
চেকুৰা চেকুৰ দাগ মাথোঁ
হৃদয়ৰ শোণিতৰ.....
হৃদয়ৰ ঠিকনা বিচাৰি
ভাগৰি ক্লান্ত হোৱাৰ পৰত
লুটিয়াই চাবা মাথোঁ
হৃদয় ডায়েৰীৰ এখিলা পাত
বিচাৰি পাবা তাতেই
মুকবধিৰ হৃদয়ৰ
এমুঠি জোনাক.....❤